قصيدة كتبتها بالدارجة إهداء لناس الحي المحمدي الأحرار :
الحي المحمدي مدرسة ماتحتاج شكَّارة***ملي تخرج من الدار ونتا تْعلّم في الشطارة
بكل افتخار في كل درب و كل حارة ***تكتب حياتك بلا قلم بلا مسطرة
الحي فن ،ثقافة، رياضة وحضارة***فينما مشيتي فيه تلقى إشارة
قاهر الاستعمار منُّو شعلات أول شرارة***سوَّل الناس لكبار يعطيوك أَمارة
ولاد الحي الاحرار ماهُم حكَّارة***ينصرو المضلوم وماعزيزة عليهم دصارة
تلقاهم في مكان في العالم مفخرة***البركة معاهم وحْْديثهم كلو إثارة
الحي فيه أبطال استحقوا التتويج بجدارة ****ياحسرة ديك ليام تَنْسات بمرارة
فيه دار الامان والشعبي وسمارة***درب مولاي الشريف وسوسيكة والكْوارا
درب السعد والرياض، الشابو طريق الحجارة*** للسعادة ودار الشباب دِير شي زيارة
كاريان سنطرال مابقى ليه آثر ياخسارة***كلها وفين مشا والباقي سكن حدا المقبرة
دوزنا فيه ذكريات وبرد وحرارة*** طلعنا رجال رغم الظروف ماشي شمكارة
طلع تشوف الفوارات والحزام وتْسارا***تما المشروع والنمرة جوج كلْها إثارة
حي عادل حداه للشهداءكاينة مقبرة***حكم وجوامع الحي تْزَيْنات بمهارة
البلوكات، القشلة،التقدم وكل عمارة***بْني قديم كان تما من عهد النْصارى
ياخسارة الحي مابقى كيف كان يا خسارة***على ديك ليَّام شحال كانت زينة ياخْسارة.
تحياتي لكم جميعا ..بقلم Hicham Fissa
